கம்யூனிஸ்டின் பெருமை அவர் வாழும் வாழ்க்கையில் மட்டுமல்ல;
அவர் நடத்தும்
வர்க்கப் போராட்டத்தில் இருக்கிறது!
கம்யூனிஸ்ட் தலைவர்களின் எளிமையான வாழ்க்கை பற்றிய வரலாற்று நினைவுகள் வெறும்
பழைய கதைகளாகக் கடந்து போகக்கூடாது. அவை இன்றைய கம்யூனிஸ்ட் இயக்கங்கள் தங்களுடைய
அரசியல் ஒழுக்கத்தையும் நடைமுறையையும் சுயவிமர்சனத்திற்கு உட்படுத்துவதற்கான
வாய்ப்பாகப் பயன்படுத்தப்பட வேண்டும்.
ஆனால் எளிமையை மட்டுமே கம்யூனிசத்தின் அடையாளமாக மாற்றுவதும் தவறு. எளிமையான
வாழ்க்கை வாழ்ந்துகொண்டே திருத்தல்வாத அரசியலை முன்னெடுக்க முடியும். அதேபோல்
தனிநபர் வசதிகளைப் பயன்படுத்துகிற ஒருவர் அவசியம் வர்க்க விரோதியாகிவிடுவதுமில்லை.
முக்கியமானது, அந்த வாழ்க்கை முறையின் சமூக உள்ளடக்கமும் அதன் அரசியல் நடைமுறையும்தான்.
மார்க்ஸ், எங்கெல்ஸ், லெனின் ஆகியோர் நமக்குக் கற்றுக்கொடுத்தது தனிநபர்
ஒழுக்கத்தை மட்டும் அல்ல; முதலாளித்துவச் சமூக அமைப்பை அறிவியல் அடிப்படையில் ஆய்வு செய்து, அதை மாற்றுவதற்கான புரட்சிகர இயக்கத்தை உருவாக்குவதையே.எனவே சு. வெங்கடேசனின் பதிவுக்கு எதிரான விமர்சனமும் அவருக்கு ஆதரவான விளக்கமும் இரண்டுமே தனிநபர் தோற்றம் என்ற எல்லையைக் கடந்து அரசியல் உள்ளடக்கத்தை நோக்கிச் செல்ல வேண்டும். ஆனால் இங்கு இல்லை என்பதே வருத்தம் அளிக்கிறது!
ஒரு கம்யூனிஸ்டின் பெருமை அவர் எந்தக் காரில் வருகிறார்
என்பதில் இல்லை; எந்த வர்க்கத்தின் பக்கம் நிற்கிறார் என்பதில் இருக்கிறது.
அவர் அணியும் ஆடையில் இல்லை;
அவர் முன்னெடுக்கும்
அரசியலில் இருக்கிறது.
அவர் பயன்படுத்தும் பதவிச் சலுகைகளில் இல்லை;
அந்தப் பதவியை
உழைக்கும் மக்களின் விடுதலைக்காக எவ்வாறு பயன்படுத்துகிறார் என்பதில் இருக்கிறது.
இந்த விவாதத்தை ஒரு தனிநபரின் கார், சட்டை, ரயில் பயணம் ஆகியவற்றோடு சுருக்கிவிடக்கூடாது.
அதேநேரத்தில் ஒரு கம்யூனிஸ்ட் மக்கள் பிரதிநிதி என்பதற்காக அவருடைய வாழ்க்கை
முறையும் அரசியல் செயல்பாடுகளும் விமர்சனத்திற்கு அப்பாற்பட்டவை என்றும்
கருதக்கூடாது.
இந்த விவாதத்திலிருந்து பின்வரும் கேள்விகளை எழுப்ப வேண்டும்.
- கம்யூனிஸ்ட்
பிரதிநிதிகளின் வாழ்க்கை முறை தொழிலாளர் வர்க்கத்தின் வாழ்க்கை நிலைமைகளோடு
எவ்வாறு தொடர்புபட்டிருக்கிறது?
- நாடாளுமன்றப்
பதவி கட்சியின் புரட்சிகர அரசியல் நோக்கங்களுக்கு எவ்வாறு பயன்படுகிறது?
- மக்கள்
பிரதிநிதிகள் பயன்படுத்தும் அரசு வசதிகளுக்கும் அவர்களுடைய அரசியல்
பொறுப்புணர்வுக்கும் என்ன தொடர்பு இருக்கிறது?
- கட்சியின்
அரசியல் நடைமுறையில் தனிநபர் செல்வாக்கும் பதவி அரசியலும் வளர்ந்து வருகிறதா?
- கட்சியின்
உறுப்பினர்கள் தங்களுடைய அரசியல் செயல்பாடுகளையும் வாழ்க்கை முறையையும்
சுயவிமர்சனத்திற்கு உட்படுத்துகிறார்களா?
- தேர்தல்
வெற்றிகளுக்கு இணையாக தொழிலாளர், விவசாயி மக்களின் சுயேச்சையான வர்க்கப் போராட்டங்களும்
வளர்க்கப்படுகின்றனவா?
இவைதான் உண்மையான மார்க்சிய அரசியல் விவாதத்தை முன்னெடுக்கும் கேள்விகள். அவை இங்கு காணவில்லையே!!!?
மேலும் ஆழமான புரிதலுக்கு....
ஒரு சாதாரண முதலாளித்துவ அரசியல் கட்சியின் உறுப்பினருக்கும் ஒரு புரட்சிகர
கம்யூனிஸ்ட் கட்சியின் உறுப்பினருக்கும் அடிப்படையான வேறுபாடு இருக்க வேண்டும்.
முதலாளித்துவ அரசியலில் தனிநபர் வளர்ச்சி, பதவி, தேர்தல் வெற்றி, அரசியல் செல்வாக்கு போன்றவை முக்கியமான இலக்குகளாக
மாறுகின்றன.
ஆனால் ஒரு கம்யூனிஸ்ட் கட்சியின் உறுப்பினர் தனது தனிப்பட்ட வாழ்க்கையையும்
அரசியல் கடமையையும் முற்றிலும் பிரித்துப் பார்க்க முடியாது.
லெனினின் என்ன செய்ய வேண்டும்? நூல் புரட்சிகர சித்தாந்தம், அரசியல் உணர்வு, அமைப்பு, ஒழுங்கமைக்கப்பட்ட கட்சிப் பணி ஆகியவற்றின் அவசியத்தை
எடுத்துரைக்கிறது.
ஒரு கம்யூனிஸ்ட் கட்சி தேர்தலில் வெற்றி பெறுவதற்காக மட்டும் இயங்குவதில்லை.
அது தொழிலாளர் வர்க்கத்தின் வரலாற்றுப் பணியை நிறைவேற்றுவதற்கான அரசியல் அமைப்பாக
இருக்க வேண்டும்.
இதனால் ஒரு மக்கள் பிரதிநிதியிடம் எதிர்பார்க்கப்படுவது என்ன?
- கட்சியின்
வர்க்க அரசியல் நிலைப்பாட்டைப் பிரதிபலிக்க வேண்டும்.
- தொழிலாளர்,
விவசாயி மக்களுடன்
உயிரோட்டமான தொடர்பு கொண்டிருக்க வேண்டும்.
- மக்களின்
போராட்டங்களிலிருந்து விலகி அதிகார மையங்களில் மட்டும் செயல்படக்கூடாது.
- கட்சியின்
அரசியல் மற்றும் அமைப்புக் கட்டுப்பாட்டிற்கு உட்பட்டிருக்க வேண்டும்.
- தனது
செயல்பாடுகள் குறித்து கட்சிக்கும் மக்களுக்கும் விளக்கம் அளிக்க வேண்டும்.
இதில் ஏதேனும் குறைபாடு இருக்குமானால் அது தனிநபரின் வாழ்க்கை முறை பற்றிய
விமர்சனத்தைத் தாண்டி கட்சியின் அரசியல் நடைமுறை பற்றிய விமர்சனமாக மாறுகிறது.
***********************************
ஆனால் இன்றைய எம்பி சு.வெங்கடேசனின் ஆடம்பர வாழ்க்கை கம்யூனிஸ்ட்களின் மேல் உள்ள பிம்பமான எளிமை மற்றும் நேர்மையை சுக்கல் சுக்கலாக உடைத்தெறிந்து விட்டது எப்போதோ....
********************************************
இனி அவரே என்ன சொல்கிறார் பாருங்கள்
.
தொடர்புடைய கட்டுரைகள்:
இதற்கு பிந்தைய விவாதம் வாசிக்க இந்த இணைப்பை அழுத்தவும் தோழர்களே
***
எமது இலக்கு இணைய இதழ்-ன் மார்க்சிய லெனினிய சிந்தனைகளைத் தொடர்ந்து வாசிக்க எம்மைப் பின்தொடரவும்.


